వైద్య రంగంలో కొత్త చరిత్ర. అమెరికాలోని UC San Diego పరిశోధకులు, సర్జన్లు \'సర్జీ\' అనే 2 హ్యూమనాయిడ్ రోబోల సాయంతో జీవించి ఉన్న జంతువులకు (పందులకు) విజయవంతంగా గాల్‌బ్లాడర్ తొలగింపు స‌ర్జ‌రీ నిర్వహించారు. వైద్య చరిత్రలో ఒక హ్యూమనాయిడ్ రోబో లైవ్ సర్జరీ చేయడం ఇదే తొలిసారి. ఈ ప్రయోగంలో ఒక సర్జరీని రోబో, మానవ వైద్యుడు కలిసి చేయగా, మరో సర్జరీని 2 రోబోలు కలసి పూర్తి చేశాయి. వైద్యులు వీటిని రిమోట్ ద్వారా నియంత్రించారు. ప్రస్తుతం అందుబాటులో ఉన్న భారీ, ఖరీదైన సర్జికల్ రోబోలతో పోలిస్తే, ఈ 60 పౌండ్ల బరువుండే చిన్న హ్యూమనాయిడ్ రోబోలు తక్కువ ఖర్చుతో కూడుకున్నవి. భవిష్యత్తులో గ్రామీణ ప్రాంతాలు, యుద్ధ రంగాలు, అంతరిక్ష ప్రయోగాల్లో ఇవి వైద్య సేవలకు ఎంతగానో ఉపయోగపడతాయని పరిశోధకులు తెలిపారు.